أشعار: صفا عزت صيام
معلش.. قبل اليوم
كانت تصبرنا..
أما دي من وائل
طعنتها في ضلوعنا..
معلش دي المرة
بتزيد في أحمالنا..
طويلة ممدودة
بطول تاريخ الجور
على أرض أجدادنا..
ضاربة في عمق الألم
في نفوسنا
في عضامنا..
زي الأسد تزأر
تصرخ: ولا تحلم
يا عدو تكسرنا..
معلش دي جرحها
في القلب كان غاير..
في دمنا تغلي
وتارنا ده ثاير..
قتلوا الولد والبلد
والحلوة بضفاير..
ومن هنا ورايح
ومن هنا وصاير..
ما بقتش معلشي
تداوي أوجاعنا..
بقت تسيب في الفؤاد
جروح تلوعنا..
وفي جوفنا دي تمرر
علينا أحلامنا..
تطعن في روح الشريف
تدمي التراب العفيف
والليل تصحينا
واليوم تبكينا
والفرح تمنعنا...
تعليقات
إرسال تعليق
شاركنا بتعليقك أو أرسل رسالة للكاتب